p-2

Պարոն Մարսուբիանը դասախոսություններ է կարդացել և բազմաթիվ հոդվածներ է հրապարակել բարոյական փիլիսոփայության, ցեղասպանագիտության, մարդու իրավունքների, գեղագիտության, հայկական լուսանկարչության և կինոյի, ինչպես նաև ամերիկյան փիլիսոփայության թեմաներին: Պրոֆեսորը դասընթացներ է մշակել մարդու իրավունքների, ցեղասպանության և Հոլոքոստին նվիրված ուսումնասիրությունների, ինչպես նաև  Հայոց ցեղասպանության թեմաների վերաբերյալ, ներառյալ դասընթացներ՝ զանգվածային ոճրագործություններին գրական և գեղարվեստական արձագանքների վերաբերյալ: Նա աշխատում է Քընեքթիքութի Կրթության պետքարտուղարությունում՝ Ցեղասպանության և Հոլոքոստի ուսումնասիրությունների խորհրդատվական կոմիտեում:

Արմեն Մարսուբիանը յոթ գրքի համահեղինակ է, այդ թվում՝ «Ցեղասպանության և հիշողության բազմակողմ հեռանկարներ» (2018), «Քննադատություն և կարեկցանք. Քլաուդիա Քարդի էթիկան և քաղաքականությունը» (2018), «Ցեղասպանությունից հետո. պատասխանատվություն և վերականգնում» (2007): Նրա մրցանակակիր գիրքն է՝ «Կորսված հայրենիքի մասնիկները. հիշելով Հայաստանը» (2015), հիմնված է իր ընտանիքի՝ Դիլդիլյանների մասին լայնածավալ հետազոտության վրա, ովքեր Օսմանյան կայսրությունում հայտնի լուսանկարիչներ էին: Պրոֆեսոր Մարսուբիանը վերջիններիս  աշխատանքների ցուցահանդեսներ է կազմակերպել Թուրքիայում, Մեծ Բրիտանիայում, Հունաստանում, ԱՄՆ-ում և Հայաստանում։ Ցուցահանդեսների վերաբերյալ նրա՝ «Վերապատկերացնելով կորցրած հայկական տունը. Դիլդիլյան լուսանկարչական հավաքածուն» հատորը լույս է տեսել անգլերեն և թուրքերեն լեզուներով: Թվային հումանիտար գիտությունների ոլորտում նա վերջերս արժանացել է National Endowment for the Humanities & Mellon Foundation Fellowship-ին: